Azərbaycanın eks-prezidenti, ümummilli lider Heydər Əliyevə Rusiyanın Buryatiya muxtar vilayətində heykəl qoyulmasına hazırlıq gedir.

Mediatv.az TASS-a istinadən xəbər verir ki, bu haqda respublikadan senator Arnold Tuloxanov jurnalistlərə bildirib. Təşəbbüsün müəllifi də məhz odur.

“Heykəl Severobaykslskda qoyulmalıdır , xalqlar arasında dostluğa, Baykal-Amur magistralının tikintisinə həsr edilməlidir”-senator deyib. Tuloxanov xatırladıb ki, bu il BAM-ın tikintisinin başa çatmasından 35 il ötür. Həmin magistralla 35 il əvvəl ilk dəfə Azərbaycandan olan inşaat dəstəsinin tikdiyi yolla “Anqoya” stansiyasına qatar gedib.

“Bu heykəl dostluq, minnətdarlıq rəmzi olmalıdır. Heydər Əliyev baş nazirin birinci müavini qismində bu ümumittifaq tikintisini kurasiya edib”-Federasiya Şurasının üzvü bildirib.

Tuloxanov deyib ki, hazırda heykəlin eskizləri hazırlanır. Layihənin reallaşmasına Buryatiyadakı azərbaycanlı diasporu da cəlb olunub. Artıq təşəbbüs qrupu yaradılıb və bu layihəni büdcədənkənar vəsaitlər hesabına maliyyələşdirmək nəzərdə tutulur.