Tovuzda azyaşlı qız mürəbbə qazanına düşüb. Hadisə bir neçə saat əvvəl Dondar Quşçu kəndində qeydə alınıb.

Mediatv.az xəbər verir ki, kənd sakinlərinin anspress-ə verdiyi məlumata görə, rayonun Dondar Quşçu kənd sakini, 2014-cü il təvəllüdlü Zəhra Sərxan qızı Abdiyeva anası mürəbbə bişirərkən qazanın yanından gedib. Elə bu zaman ətrafda olan uşaq qazanın yanına yaxınlaşıb və içərisinə yıxılıb. Bədən səthinin 50 faizi yanan azyaşlını dərhal Tovuz Rayon Mərkəzi Xəstəxanasına çatdırıblar.

Xəstəxanadan verilən məlumata görə, uşağa ilkin tibbi yardım göstərilib və vəziyyəti ağır olduğu üçün Bakıya göndərilib.

Bundan qabaq da oxşar hadisə Masallı rayonunda baş vermişdi. Rayonun Ərkivan qəsəbəsində yaşayan 3 yaşlı Aylim Mirzəyeva həyətlərindəki qaynar qazana düşmüş, yanıq xəsarəti alan azyaşlını xəstəxanaya gətirsələr də orada dünyasını dəyişmişdi.