Türkiyədə 32 yaşlı Azərbaycan əsilli Gürcüstan vətəndaşı H.İ. 550 min lirəlik avtomobil oğurluğuna görə saxlanılıb. 

Mediatv.az Türkiyə mətbuatına istinadən xəbər verir ki, hadisə iki həftə əvvəl Beşiktaş bölgəsində baş verib.

Azərbaycanlı H.İ. türk A.Y. ilə birlikdə avtomobil kirayələmək üçün kirayə şirkətinə müraciət edib. 550 min lirə dəyərində "Range Rover"i 5 günlük kirayələsə də, sonra içərisindəki GPS cihazını söküb.

Avtomobilin kirayə müddətinin keçdiyini və onun yerini təyin edən cihazla əlaqənin itdiyini görən şirkət rəhbərliyi polisə müraciət edib. Məlum olub ki, avtomobili kirayə götürən şəxslər onu Şırnak vilayətinin Silopi bölgəsinə gətiriblər. Burada isə onu İraqa keçirmək üçün 500 dollar qarşılığında A.K. adlı şəxsə təslim ediblər. O, avtomobilə saxta nömrə taxaraq, İraqın Duhok bölgəsinə keçirmək üçün sərhəddə beş gün növbəyə dayanıb.

Avtomobil kirayə mərkəzinin sahibi Sinan Dəmirin polisə müraciəti əsasında əməliyyat başlanıb və polis Şırnakın Uludərə ərazisində sərhəddən keçmək istəyərkən, avtomobili saxlayıb. AVtomobili sərhəddən keçirmək istəyən şəxsdən başqa daha 3 nəfər həbs olunub. Polisdə ifadə verdikdən sonra təqsirkarlar sərbəst buraxılıblar. Cip isə sahibinə təslim edilib.