Dünya (22-03-2017, 23:16)
Terrorçu təşkilat: “Qüvvələrimizi 100 min nəfərə çatdıracağıq”
Suriyalı kürdlər öz silahlı qüvvələrini 100 min nəfərə çatdırmağı planlaşdırır.
Mediatv.az: İddianı PYD sözçüsü Redur Xəlil irəli sürüb.
“Reuters” agentliyinə açıqlamasında PYD sözçüsü “100 minlik ordu” hədəflərinin reallaşacağı son tarixi göstərməkdən də çəkinməyib: “Hədəfimiz 2017-ci ilin ikinci yarısında reallaşacaq!”.
Xəlilin bildirdiyinə görə, hazırda PYD-yə bağlı qüvvələrin sayı 60 min civarındadır. Onların arasında qadın əsgərlər də mövcuddur.
Türkiyənin iddialarına görə, PYD terrorçu təşkilat olan PKK-nın Suriya qanadıdır. PKK-nın bu qanadının hərbi gücə çevrilməsində başda ABŞ və İsrail olmaqla, bir sıra dünya dövlətləri mühüm rol oynayırlar. Pentaqonun Şimali Suriyada kürd separatçılarının nəzarətində 8 hərbi baza yaratdığı güman olunur. Rusiya da separatçıları dəstəkləmək yarışında əzəli düşməni ABŞ-dan geri qalmaq istəmir, bir çox hallarda PYD-ni açıq-aşkar müdafiə edir.
Son zamanlar Suriyanın Afrin bölgəsində “müharibəni müşahidə bürosu” adı altında Rusiyanın separatçılara hərbi təlim keçdiyi də gələn məlumatlar arasındadır.