Dünya (14-02-2017, 09:27)
BMT Təhlükəsizlik Şurası Şimali Koreyanın ballistik raket buraxmasını pisləyib
BMT Təhlükəsizlik Şurası Şimali Koreyanın ballistik raket buraxmasını pisləyib.
Mediatv.az: Bu barədə BMT TŞ-nın bəyanatında bildirilir.
Qeyd olunub ki, Şimali Koreyanın yürütdüyü siyasət beynəlxalq təhlükəsizliyə təhdid yaradır.
“Rəsmi Pxenyan yeni raket sınağı keçirməklə BMT Təhlükəsizlik Şurasının 6 qətnaməsini pozub. BMT Təhlükəsizlik Şurası raketlərin buraxılmasından sonra Koreya yarımadasındakı vəziyyəti izləyərək zəruri addımlar atacaq”, – deyə sənəddə vurğulanıb.
BMT TŞ 2016-cı il, martın əvvəlində KXDR-ə qarşı yeni sanksiyalar paketini yekdilliklə qəbul edib. Buna baxmayaraq, Şimali Koreya nüvə sınaqları və ballistik raketlərin buraxılışını davam etdirir.
Xatırladaq ki, fevralın 12-də Şimali Koreya Yapon dənizinə doğru ballistik raket buraxıb. Phönan-Pukto əyalətindəki kosmodromdan buraxılan raket 500 km uçaraq, Yapon dənizinə düşüb. Sınaqda Şimali Koreyanın rəhbəri Kim Çen In iştirak edib.