Cəmiyyət (8-09-2017, 12:15)
Toyda zəhərlənmə: Kimdir günahkar?
Ötən gün Tovuzda şadlıq sarayında baş verən kütləvi zəhərlənmə hadisəsinə restoran rəhbərliyi münasibət bildirib.
Mediatv.az-ın məlumatına görə, rəhbərlikdən “Qafqazinfo”ya bildirilib ki, zəhərlənmə hadisəsinin onlarla əlaqəsi yoxdur: “Bizdə restoranlar kirayəyə verilir. Yəni toy sahibi ərzaqları özü gətirir. Toy ötən gün günorta olub. Axşam saatlarında toyda iştirak edənlərin vəziyyəti pisləşib. Onlar dil və bağırsaq yeyiblər. İlkin olaraq güman edilir ki, zəhərlənmə bundan baş verə bilər”.
Millət vəkili Qənirə Paşayeva da məsələ ilə bağlı bildirib ki, artıq qida nümunələri analiz üçün laboratoriyaya göndərilib: “ Biz əhali arasında maarifləndirmə işini gücləndirməliyik. Xüsusilə yay aylarında qida zəhərlənmələrinin baş vermə ehtimalı artır. Ona görə də kütləvi şəkildə mərasim keçirən toy sahibləri buna diqqət yetirməlidirlər. İnsanlar da yediyi qidaya fikir verməlidirlər. Çünki zəhərlənmənin ciddi fəsadları olur. Yaxşı ki, toyda bu qədər adam zəhərlənməsinə baxmayaraq,m ciddi fəsad olmayıb, hamıya yardım edilərək, evə buraxılıb”.